د مالیې وزارت وايي، د دغه وزارت د املاکو لوی ریاست توانېدلی دی چې په روان ۱۴۰۳ل کال کې د دغه وزارت اړوند ۳ غصب شوي جایدادونه بېرته تر لاسه کړي.
له یاد وزارت څخه په خپره شوې خبرپاڼه کې ویل شوي، همدا راز د املاکو ریاست توانېدلی چې نږدې ۱۱۷ جایدادونه په کابل او د ۴۰ نورو جایدادونو هوکړهلیکونه په ولایتونو کې د داوطلبۍ له لارې د حقوقي او حقیقي اشخاصو سره لاسلیک کړي.: «د دې هوکړهلیکونو ترڅنگ د مالیې وزارت اړوند د ۷۵ جایدادونو د هوکړې خبرې هم روانې دي، چې له ارزونې او ډاډ وروسته به قرارداد ته وړاندې شي.»
د خبرپاڼې له مخې، د مالیې وزارت په ټولیز ډول په ولایتونو او مرکز کې ۳۶۱ جایدادونه لري، چې ۵۳ جایدادونه یې ځمکه او ۳۰۸ جایدادونه یې ودانۍ دي.
د یادونې وړ ده، د مالیې وزارت د املاکو لوی ریاست د دغه وزارت یو له مهمو ریاستونو څخه شمېرل کېږي، چې دنده یې د املاکو اړوند د کره شمېرو او احصایو راټولو، د حکم لرونکو اسنادو سره سم د دولتي ادارو ترمنځ او یا د خلکو او دولتي ادارو ترمنځ د املاکي شخړو حل، په هېواد کې او له هېواده بهر د مالیې وزارت اړوند ټولو غیر منقولو حکومتي جایدادونو تسلیمي، ثبت او اجاره ورکولو، د مالیې وزارت له غیر منقولو جایدادنو څخه سمه ساتنه او معقوله گټه اخیستنه ده.
د مالیې وزارت د ۳ جایدادنو د بېرته تر لاسه کولو خبره داسې مهال کوي، چې د عدلیې وزارت هم ویلي چې په تېره یو میاشت کې یې د هېواد په ۲۱ ولایتونو کې ۲۳۲ زره جریبه ځمکه تثبت کړې ده او زرگونه جریبه خمکه یې له غصب څخه راگرځولې ده.