د امریکا اوسني ولسمشر جو بایډن ویلي، د امریکا د راتلونکو ولسمشریزو ټاکنو څخه تېرېږي. نوموړي پر خپلې اېکسپاڼه لیکلي، چې دغه پرېکړه یې د خپل گوند او هېواد په گټه ده.
بایډن ویلي، د ولسمشر په توگه د اوسنۍ دورې تر پایه به خپلې دندې ته دوام وکړي او د ولسمشریزو ټاکنو د کمپاین پر ځای پر خپلې دندې تمرکز کوي.: «په داسې حال کې چې زما اراده وه چې بيا وټاکل شم، زه باور لرم چې دا به زما د گوند او هېواد په گټه وي چې له نوماندۍ تېر شم او د ولسمشر په توگه د خپلې پاتې مودې په کارونو تمرکز وکړم.»
بایډن همدا راز ویلي، د ولسمشر په توگه یې دنده کول د ژوندی لوی ویاړ و.:«اجازه راکړئ چې د امریکا د خلکو لخوا په ما باندې د شوي باور لپاره خپل رښتیني احساسات څرگند کړم. زه تل په دې باور یم چې که موږ متحد نه شو نو امریکا هېڅ نه شي کولی. موږ باید په یاد ولرو چې موږ د امریکا متحده ایالات یو.»
د بایډن دیموکرات گوند غړي هم وايي، چې بایډن باید استعفا ورکړي؛ ځکه له ټرمپ سره په مناظره کې نوموړي خپله کمزروي ښکاره کړه.
د امریکا پخواني ولسمشر ډونلډ ټرمپ ویلي، جو بایډن د ولسمشرۍ وړ نه و او نه د دې جوگه و چې بیا ولسمشر شي. ټرمپ پر بایډن تور پورې کړی، چې نوموړی ولسمشرۍ ته یوازې په دروغجنو خبرونو ورسېد.
د امریکا راتلونکې ولسمشریزې ټاکنې د نومبر په میاشت کې کېږي، چې د دیموکرات گوند له لوري یې بایډن نوماند و؛ خو د اوس لپاره کېدای شي د دغه گوند غړې او د بایډن مرستیاله کمېلا هارېس راتلونکو ولسمشریزو ټاکنو ته نومانده شي.
۸۱کلن بایډن به د ۲۰۲۵ز کال د جنوري تر۲۰ مې د امریکا ولسمشر وي او له هغه وروسته به نوی ولسمشر خپلې چارې پیلوي.
د امریکا ولسمشریزې ټاکنې په هر څلورو کلونو کې کېږي، چې یوازې جمهوري غوښتونکي او دیموکرات گوندي غړي پکې واک ته رسېږي.