د احصایې او معلوماتو ملي ادارې مسوولینو نن د حکومت د اطلاعاتو او رسنیو په مرکز کې د یوې خبري غونډې پر مهال، د دغې ادارې د یو کلنو فعالیتونو او لاسته راوړنو راپور له رسنیو سره، شریک کړ.
د دغې ادارې د مسئولینو په وینا، د وروستي یوه کال په جریان کې ۳ مېلیونه او ۲۶۵ زره او ۶۰۰ برېښنايي پېژندپاڼې وېشل شوي، چې د مخکېني کال په پرتله ۲۳ سلنه زیاتوالی ښیي.: «د اسلامي امارت له بیا واکمنېدو راهیسې ۷.۸ مېلیونه برېښنايي پېژندپاڼې وېشل شوي او د دې بهیر له پیل څخه تر دې مهاله په ټولیز ډول د وېشل شوو برېښنايي پېژندپاڼو کچه، ۱۳ مېلیونه او ۸۶۸ زرو ته رسېدلې ده.»
د یادې ادارې مسوولینو وویل، هېوادوالو ته د لا ښو خدمتونو وړاندې کولو په موخه، په مرکز او ولایتونو کې د اسان خدمت پينځه دفترونه فعال شوي، چې څه باندې ۲۰۰ زره کسانو ته یې د برېښنایي پېژندپاڼو، زېږون کارتونو د وېش او نورو برخو کې اړین خدمتونه وړاندې کړي دي. دغه راز ډېر ژر به په پکتیا، فاریاب، فراه او کندوز ولایتونو کې هم د اسان خدمت څانگې پرانیستل شي.: «په بهر کې هېوادوالو ته د ښو او چټکو خدمتونو وړاندې کولو په موخه، په متحده عربي اماراتو کې د اسان خدمت څانگه فعاله شوې او تمه ده چې په نږدې راتلونکي کې به په ایران، پاکستان، سعودي عربستان او ترکیې کې هم د اسان خدمت څانگې پرانیستل شي.»
د احصایې ادارې مسوولینو زیاته کړه، د کره او دقیقو شمېرو موندلو په منظور یې د وروستي یوه کال پر مهال په بېلابېلو برخو کې گڼې سروې گانې کړي چې پایلې یې له اړوندو ادارو سره شریکې شوي دي.: «په تېر کال کې د هېواد ناخالصه تولید ۱۷.۲۳ مېلیارده ډالر وو، چې د مخکېني کال په پرتله ۲.۷ سلنه زیاتوالي ښیي. پرو سږکال په ۲ مېلیونه او ۲۳ زره هکټاره ځمکه غنم کرل شوي وو، چې په حاصلاتو کې یې د مخکېني کال په پرتله ۱۴.۴ سلنه زیاتوالی راغلی دی. د دې ترڅنگ، د غلو حاصلات ۵ مېلیونه او ۲۰۶ مټریک ټنه او د پُنبې حاصلات ۱۲۲ زره او ۴۵۵ مټریک ټنه وو، چې د مخکېني کال په پرتله په ترتیب سره، ۱۳.۲ او ۶۸.۹ سلنه زیاتوالی په ډاگه کوي.»
همدا راز د یادې ادارې مسوولینو وویل، په بېلابېلو برخو کې یې سروې کړې، ۴ مېلیونه ته د برېښنايي پېژندپاڼو د وېش شمېر رسول، په کابل، بلخ، ننگرهار، هلمند او هرات ولایتونو کې د اسان خدمت د څانگو فعالول، په ایران، پاکستان، سعودي عربستان، او ترکیې هېوادونو کې د اسان خدمت څانگو پرانیستل، د هرات په شین ډنډ، د ننگرهار په شینوارو، د غزني په مقُر، د بلخ په بلخ او د بدخشان په کیشم او راغستان ولسوالیو کې د برېښنايي پېژندپاڼو د وېش څانگو پرانیستل؛ په روان کال کې د دغې ادارې له مهمو لومړیتوبونو څخه دي.
د یادې ادارې مسوولینو وویل، پرو سږکال د هېواد په کچه د وگړو سر شمېرنه شوې، چې په ترڅ کې یې د افغاستان د وگړو شمېر ۳۵.۸ مېلیونه اټکل شوی، چې ۱۸.۲ مېلیونه نارینه او ۱۷.۵ میلیونه یې ښځې دي. د دې شمېرنې له مخې ۹.۲ مېلیونه وگړي په ښارونو او ۲۵مېلیونه نور یې په کلیوالي سیمو کې ژوند کوي.
له تېرې اوونۍ راهیسې د دولتي ادارو د حساب ورکولو لړۍ پیل شوې ده، چې هره اداره خپلې لاستهراوړنې د رسنیو پر وړاندې شریکوي.