د افغانستان د ملي دفاع وزارت وايي، “د عبدالله بن مسعود (رض) د جګړه ایزو ګډو زده کړو قوماندانۍ له پنځو مسلکي کورسونو څخه د سیمیزو قول اردوګانو او قطعاتو ۸۹ تنه ځوان منسوبین د یو لړ مراسمو په ترڅ کې فارغ شول.”
په خبرپاڼه کې ويل شوي، مسوولینو تازه فارغ شويو ته د وینا پر مهال ويلي اسلامي نظام ته خدمت د تقوا په رڼا کې ترسره کړئ او په خپلو قطعاتو او جزوتامونو کې نور مجاهدین د مسلکي زده کړو ترلاسه کولو ته وهڅوئ.
دغه راز په خبرپاڼه کې ويل شوي، “نویو فارغانو د هېواد په هر ګوټ کې اسلامي نظام ته د خدمت کولو په موخه خپل چمتووالی ښودلی دی.”
دا په داسې حال کې ده چې څو ورځې وړاندې هم له يادې قومندانۍ څخه ۱۵۳ تنه ځوان منسوبين فارغ شوي وو.