د شر او فساد د یوې ډلې مشر احمد مسعود د پاکستان جنرالانو ته چاپلوسي کوي

لیکوال: ډاکټر زرغون شاه زېور

د شر او فساد ډلې تل پښتانه د ISI نوکران بللي، په تېر نظام کې چې د دوی په عسکرۍ منځ ته راغلی وو بیا هم دوی پښتانه وکیلانو، والیانو، وزیرانو او نظامي منسوبینو د ستون پنجم خطاب کاوه، له ستون پنجم نه مراد د پاکستان د څارګرې ادارې جاسوسان وو.

همدا ډول دوی طالبان هم د پاکستان په نوم تورن کول او ویل به یې چې طالبان د جګړې ظرفیت نه لري دا پنجابیان دي چې دلته عملاً په جګړه اخته دي.

خو کله چې طالبانو ته د ټول افغانستان واک لاس ته ورغی، په لیکو کې یې هیڅ بهرنی طالب نه وو موجود، ټول ولسي خلک او د همدې وطن بچيان وو.

تصادف ته ګوره چې همدا کولابي جاسوسان پنجابي جاسوسان هم وختل.

کله چې طالبان کابل ته د ننوتلو په حال کې وو میر رحمان رحماني، یونس قانوني، صلاح الدین ربانی، کریم خلیلي او عبدالطیف پدرام په الوتکه کې پاکستان ته وتښتېدل او هلته د شاه محمود قریشي تر مخ ځړېدلي ولاړ وو، اصلاً دوی د پاکستاني چارواکو حلقه بګوش مزدوران وو؛ دا هغه منحوثې څهرې وې چې تل به یې پښتانه د پاکستان په غلامۍ تورنول مګر وروسته یې نقابونه له مخه ولوېدل.

اوس تازه احمد مسعود ویلي چې پاکستان کې د ناکراریو مسولیت د افغانستان په غاړه دی، د مسعود دا غیر مسولانه موقف یوازې د پاکستاني نظامیانو پښو ته ټیټېدل دي؛ دا خو ټولو ته جوته ده چې پاکستان د افغانستان سره د ورورۍ په فضاء کې هېڅ وخت نه تېروي، همېشه یې د اوبو خړولو هڅه کړې ده.

د هر پښتون بچی په دې خبره اګاه دی چې پاکستان د افغانانو او افغان جغرافیې دښمن دی؛ مګر مسعود خیلو په ډېرې سپین سترګۍ سره پښتانه د پاکستان نوکران و بلل.

خو وخت ډېر بې رحمه قاضي دی او د دوی له مشکوکو او مرموزو څهرو یې نقابونه لرې کړل؛ د مسعود دا موقف زموږ په خیر دی ځکه چې په افغانستان کې به هر فکر ومنل شي خو د پاکستان د غلامۍ او طرفدارۍ فکر د کفر تر بریده مردود دی.

کله چې طالبانو واک ونیوه نو د ننګرهار د استخباراتو ریس مولوي بشیر تورخم ته ورغی یو پاکستاني عسکر ته یې وویل: سهوه کې به هم دې خوا نه را ګورې ګنې له یهودو سره جنګ ته دومره نه یم خوشحاله څومره چې تاسو سره په جنګ خوشحال یم.

یادؤنه: په هندوکش‌غږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکش‌غږ توافق ورسره شرط نه دی.