د اوبو او انرژۍ وزارت د يوې خبرپاڼې په خپرولو سره د اسلامي امارت د لوړ پوړو مسؤلینو، سیمه ییزو مسؤلینو او د لغمان ولایت د ګڼ شمېر اوسېدونکو په شتون کې د لغمان د شاهي کانال د لومړي فاز پروژې د لومړۍ برخې( لاټ) د پروژې د کار له پيل خبر ورکوي.
د ياد وزارت خبرپاڼه کاږي چې د اوبو او انرژۍ سرپرست وزیر د دغې پروژې په پرانیست غونډه کې د يادې پروژې ارزښت ته اشاره وکړه او ژمنه یې وکړه، چې هڅه کوي چې د دغه کانال د نورو برخو د پلي کولو امکانات هم چمتو شي.
د خبرپاڼې پر بنسټ ښاغلي منصور یادونه وکړه، چې د اوبو او انرژي وزارت له لوري په هېواد کې د اوبو او برېښنا د تولید بندونو د جوړولو په برخه کې ګڼ شمېر کارونه ترسره شوي او اوسمهال هم د پنځو نورو سترو بندونو د پروژو د پلي کولو لپاره امکانات چمتو شوي، چې چارې به یې په نږدې راتلونکي کې پيل شي.
خبرپاڼه زياتوي چې په پرانست غونډه کې د لغمان والي شیخ شیراحمد حقاني او د اوبو او انرژۍ وزارت سلاکار ډاکټر فاروق اعظم د شاهي کانال جوړونه نه یوازې د لغمان، بلکې د افغانستان د ټولو خلکو لپاره یوه ستره او ارزښتناکه لاسته راوړنه بللې او د ياد کانال جوړونه یې د اوبو د مدیریت او د کرنې د پراختیا په برخه کې یو ستر ګام ياد کړی.
د یادونې وړ ده، چې شاهي کانال د لغمان ولایت په الینګار ولسوالي کې موقعیت لري او دغه کانال په ټوله کې د دوو فازونو په درلودلو سره 70 کیلو متره اوږدوالی لري، چې کابو 20 زره هکتاره ځمکه خړوبوي.
د دغې پروژې لومړی فاز د 30 کیلو متره په اوږدوالي سره په څلورو برخو(لاټونو) کې پلي کېږي او ۵ زره هکتاره کرنیزه ځمکه خړوبوي چې د دغې پروژې د لومړي فاز لومړۍ برخه 6.6 کیلو متره اوږدوالی لري، چې د پلي کولو په موخه یې له دوو ودانیزو شرکتونو سره قرارداد شوی دی.