بغاوتګر هیله لري، چې که ټرمپ د واک پر ګدۍ کښېني، نو بیا ځل به جمهوري غوښتونکی ګوند له صلاحیتونو برخمن شي، نو په بهر کې میشت باغي ډلو – ټپلو ته به د مالي او تسلیحاتي ملاتړ زمینه مساعده کړي، ترڅو بیا ځل افغانستان د یوې بلي خونړۍ جګړې خوا ته ور ټیل وهي او نسبي امنیت له ولسونو واخلي.
جمهوري غوښتونکي ګوند چې د پوځ ملاتړ لري او په افغانستان کې یې پخوا د یوې ستراتیژۍ له مخې د جګړې پلوي کوله، مګر دا مهال یې د افغانستان په اړه دریځ نا څرګند دی او تر ډېره د امریکا داخلي وضعیت ته توجه کوي.
خو په امریکا کې د بهرنیو جګړو په اړه د پرېکړو مرجع یواځې ولسمشر او پوځ نه دي، بلکې د دغه هېواد د بهرنیو متحدینو په شمول، د دغه هېواد کانګرس، امنیت شوری او استخباراتي ادارې هم دي؛ اوس مهال امریکا د اوکراين جګړې د اکمال تر څنګ له اسرائیل د دفاع او منځني ختیځ د جګړو مدیریت ته اولویت ورکړی.
بلخوا امریکا په افغانستان کې د یوې بلي جګړې لپاره داسې دلایل او لارې چارې په لاس کې نه لري، چې نړیوالو متحدینو ته پرې قناعت ورکړي او جګړه پیل کړي، ځکه چې:
۱. اوسنی افغانستان د دوحې تړون له مخې د امریکا او نورو هېوادونو لپاره ګواښ نه دی.
۲. په افغانستان کې د حاکمیت لپاره پخواني سیاسیون او نظامي مشران چې بې شرمانه ماتې یې وخوړه، د یوې بلې جګړې د مدیریت لپاره نه انتخابوي.
۳. په افغانستان کې د امریکا ګټې په سیاسي لحاظ لا هم په خطر کې نه دي، ځکه چې افغانستان اوس یو بې طرفه او مستقل سیاست لري.
۴. امریکا، نړۍ او د سیمې هېوادونه په دیپلوماتیکو پرمختګونو او ډیالوګ رامنځته کولو باور لري.
۵. د ۲۰۰۱م کال په پرتله اوس مهال، د سیمې هېوادونو له لارې د امریکا لپاره لوژستیکي اکمال تر ډېره ممکن نه دی، ځکه د سیمې هېوادونه هم تر ډیره د جګړې لپاره تیار نه دي.
۶. له افغانستان څخه تښتېدلي ټول سیاسيون او چارواکي په یوه خوله نه دي، یعني ټول یا په سیاسي او یا هم په نظامي مبارزه باور نه لري، بلکې نظرونه او دریځونه یې تیت دي.
۷. له نړیوالو سره په افغانستان کې د بشري وضعې(فقر او بېکارۍ) په اړه اندېښنه شته، نو له دې کبله د جګړې پر ځای بشري مرستو ډېرولو ته اولویت ورکوي، څو په افغانستان کې د فقر کچه ټیټه شي.
پورته دلایلو او علتونو ته په کتلو په افغانستان کې د یوې بلي جګړې لپاره د بغاوتګرو هیلې ناسمې دي او تر څو ورځو پورې یواځې د ځان مطرح کولو او عامه اذهانو مغشوش کولو په موخه په ځلونو یادي هیلې څرګندوي.
یادؤنه: په هندوکشغږ کې نشر شوې لیکنې، مقالې او تبصرې یواځې د لیکوالانو نظر څرګندوي، د هندوکشغږ توافق ورسره شرط نه دی.