د افغانستان اسلامي امارت د عدلیې وزارت د یوې اعلامیې په خپرولو سره ویلي چې، د امارتي غصب شویو ځمکو قضیو ته د رسېدنې ځانګړې محکمې د کابل ښار د شپږمې ناحیې اړوند د سناتوریم په سیمه کې څه باندې ۲۳ جریبه ځمکه له بر رسۍ وروسته امارتي تثبیت کړې او ژر به یې اړوندو ادارو ته وسپاري.
یاده ځمکه د کادستر په ۵۶ شمېره قطعه کې د امارتي املاکو په نوم ثبت ده او د کابل ولایت د امارتي غصب شویو ځمکو د تثبیت او تشخیص تخنیکي هیئت د بررسۍ په ترڅ کې امارتي تثبیت شوې ده.
د امارتي ځمکو له غصب څخه مخنیوی او د غصب شویو ځمکو استرداد د افغانستان اسلامي امارت له اساسي موخو څخه ده چې د ځمکو له غصب څخه د مخنیوي او د غصب شویو ځمکو د استرداد کمېسیون په همدې منظور رامنځته شوی دی.