د کابل ښاروالۍ ویلي، چې د پنځمې ناحیې اړوند، د کابل-کندهار له سړک څخه د دارالسلام روغتون او مالګدامونو تر څنګ پورې د نوي سړک جوړولو چارې د ۱۳۹ میلیونه او ۵۹۴ زره او ۷۰ افغانیو په لګښت پیل کړې دي.
د کابل ښاروالۍ د معلوماتو له مخې، دغه سړک ۲ زره او ۳۰۵ متره اوږدوالی او ۲۰ متره سور لري، چې د بېلابېلو سیمو د نښلولو، د ښاري سړکونو شبکې د پراختیا او د اقتصادي ودې په موخه جوړېږي. د پروژې چارې به په اتو کاري میاشتو کې بشپړې شي.
د کابل ښاروالۍ د مسوولینو په خبره، د دې سړک په جوړېدو سره به د خلکو د تګ راتګ اسانتیاوې زیاتې او د اړوندو سیمو اقتصادي او ټولنیزه وده به پیاوړې شي.


