د افغانستان اسلامي امارت د ریاست الوزراء اقتصادي معاونیت د یوې خبر پاڼې په خپرولو سره ویلي چې، د اسلامي امارت د مشرتابه په مشرۍ د اقتصادي کمېسیون په ځانګړې غونډه کې یو لړ مهمې پرېکړې ترسره شوي دي.
د یادې خبرپاڼې له مخې په دغه غونډه کې د چارو ادارې لوی ریاست په ګډون اړوندو بېلابېلو حکومتي ریاستونو او وزارتونو استازو ته دنده سپارل شوې چې په ټول افغانستان کې د شریعت خلاف بد رواجونه تثبیت، د مخنیوي لپاره دې تګلاره جوړه او د اسلامي امارت د رهبرۍ مقام ته یې وړاندې کړي.
د دغې غونډې په دوام د چارو ادارې لوی ریاست د سرپرست شیخ نورالحق انور په مشري، د کور او ښار جوړولو، عدلیې، کرنې اوبولګولو او مالدارۍ او د صنعت او سوداګرۍ وزارتونو او کابل ښاروالۍ په ګډون پلاوي ته دنده سپارل شوې، هغه ځمکې چې خالص امارتي ملکیت او د هستوګنې او سوداګرۍ لپاره دي، تر ښاري پلان لاندې او بنسټیزې چارې یې یوه اندازه ترسره شوې وي هراړخیزه کړنلاره دې ورته جوړه کړي چې له مخې یې خلکو ته ځمکې په اصولي توګه و ویشل شي.
همداراز هغه هستوګنیز ښارګوټي چې د غصب د مخنیوي او غصب شویو ځمکو د استرداد کمېسیون له لوري امارتي ثابت شوي او تصفیه شوي دي، هراړخیزه کړنلاره ورته جوړه کړي چې له مخې یې د ښاري پلان مطابق خلکو ته د ابادۍ او ودانولو په موخه تملیکاً ورکړل شي.
همدا راز یاد پلاوي ته لارښوونه شوې چې د ښاري پلان له مخې دې، د خلکو په شخصي ځمکو کې د ابادۍ او ودانیزو چارو ترسره کولو بهیر اسانه او سهولتونه ورته رامنځته کړي.
د اسلامي امارت د رهبر په مشرۍ په دې غونډه کې د کرنې، اوبولګولو او مالدارۍ، صنعت او سوداګرۍ وزارتونو او اراضي ریاست په ګډون پلاوي ته دنده سپارل شوې، چې د کابل په څلورو خواوو کې د صنعت اولیه او خفیفه لپاره دوه دوه زره جریبه ځمکه د صنعتي سیمو د جوړولو په موخه د افغانستان اسلامي امارت له لوري د نوي منظور شوي قانون له مخې وسپارل شي.
یاد پلاوي ته دنده سپارل شوې چې په ننګرهار، کندهار او بلخ ولایتونو کې د صنعتي ساحو لپاره شل شل زره جریبه ځمکه د اسلامي امارت د رهبر له لوري د نوي منظور شوي قانون، چاپېریال ساتنې او ماسټر پلان له مخې ځانګړې او وسپاري. همدا راز لارښوونه شوې چې د یادې ځمکې له یوې برخې څخه د کانونو د پروسس کولو لپاره هم ګټه واخیستل شي.
خبرپاڼه کې وړاندې راغلي چې دې پلاوي ته دنده سپارل شوې چې په کندوز ولایت کې دې لس زره جریبه ځمکه د صنعتي سیمو لپاره د امارت له لوري د نوي منظور شوي قانون، چاپېریال ساتنې او ماسټر پلان مطابق ځانګړې او وسپارل شي.
همداراز د کوچني صنعت یا تشبثاتو لپاره دې په هر ولایت کې له لس څخه تر پنځوس جریبه ځمکه د صنعتي ساحو لپاره د اسلامي امارت له لوري د نوي منظور شوي قانون، چاپېریال ساتنې او ماسټر پلان مطابق ځانګړې او وسپارل شي او د مالدارۍ، کرنې او د چرګانو پالنې لپاره دې خلکو ته ملکیتاً یا په اوږدمهاله د تمدید وړ اجاره ورکولو په موخه هراړخیزه کړنلاره چمتو کړي.
د خبرپاڼې له مخې د دې غونډې په دوام د اقتصادي کمېسیون استازو ته دنده سپارل شوې چې، د لویو لارو په اوږدو کې هغه ځمکې چې هلته د مسجد او لوازماتو د ودانولو په موخه ټولګټو وزارت ته تثبیت شوې او د یاد وزارت له لوري تراوسه نه دي ابادې شوې، خصوصي سکټور ته ورکړي، چې نارینه او ښځینه مسجدونه، تر څنګ یې تېل پمپونه، هوټل او د مسافرو د اړتیاوو مطابق ودان کړي چې د مسافرو لپاره د اسانتیاوو رامنځته کولو سربېره خلکو ته د کار زمینه هم برابره شي.
د اقتصادي کمېسیون په دې ځانګړې غونډه کې د کرنې، اوبولګولو او مالدارۍ او اوبو او انرژۍ وزارتونو او اراضي ریاست ته دنده سپارل شوې چې، په هغو سیمو کې چې امارتي ځمکې او ترڅنګ یې اوبه شتون ولري، د اغېزمنې ګټې اخیستنې او خلکو ته د اجاره ورکولو په موخه هراړخیزه طرحه چمتو کړي.
همداراز په دغه غونډه کې د امارتي شرکتونو لوی ریاست ته سپارښتنه شوې چې د سپين زر امارتي شرکت اړوند له کوکچې تر آبدان دښتې د کانال طرحه اقتصادي کمېسیون ته واستوي او د منظورۍ په موخه دې د اسلامی امارت د رهبرۍ محترم مقام ته وړاندې کړي.