د افغانستان بانک په یوه خبرپاڼه کې ویلي چې، د دې بانک سرپرست رئیس ښاغلي نوراحمد آغا په مشرۍ د صرافانو ټولنې له استازو سره غونډه جوړه شوې او د افغانۍ د ارزښت ساتنې، احتکار او اسعارو د قاچاق د مخنیوي اړوند مسائلو په اړه یې ورسره خبرې وکړې.
د خبرپاڼې له مخې، په دغه غونډه کې د افغانستان بانک سرپرست رئیس ښاغلي نور احمد آغا یادونه کړې چې د افغانستان بانک د خپلو قانوني او ملي مسؤلیتونو په چوکاټ کې په پوره تعهد سره هڅې کوي چې د هېواد اقتصادي ثبات، د افغانۍ ارزښت ساتنې، او د بیو د ثبات لپاره اړین اقدامات ترسره کړي.
د یادونې وړ ده چې د افغانستان بانک تر دې وړاندې ویلي چې د افغانۍ د ټیکاو په موخه سبا ورځ ۲۵ میلیونه ډالر لیلاموي.