پاکستاني طالبانو د عمر میډیا له لارې د تېرې فبرورۍ مياشتې بريدونو د تفصیلي راپور په خپرولو سره ويلي، چې ځواکونو یې تېره مياشت په ۱۴۷ بريدونو کې د پاکستان حکومت بېلابېلو ادارو ۸۵ کسان وژلي، ۹۵ یې ټپيان کړي او ۶ نور یې ژوندي نيولي دي.
د سرچينې په وينا، د تېرې مياشتې په لړ کې پاکستاني طالبانو تر ټولو ډېر ۳۴ بريدونه په شمالي وزيرستان، ۲۷ په جنوبي وزيرستان، ۲۴ په خيبر او ۱۲په دېره اسماعيل خان ولايتونو کې ترسره کړي دي.
د پاکستاني طالبانو په دغو بريدونو کې ليزري وسلې، لاسي بمونه، هدفي، يرغليز او ځوابي بريدونه شامل دي.
د معلوماتو له مخې، په دغو بريدونو کې پاکستاني طالبانو د پوځ او پوليسو ۱۴ پوځي نقلیه وسایطو، ۲۰ امنیتي کامرو، او د ۴ پوستو له نيولو او تخریب سربېره ګڼ شمېر تاسيسات ويجاړ کړي او ۴ ميله کلاشينکوفونه او يو راکټ یې هم ترلاسه کړی دی.