ایراني رسنیو راپور ورکړی، چې د ایران ستر مذهبي رهبر، مجتبی خامنهیي، د دغه هېواد وسلهوالو ځواکونو ته لارښوونه کړې، چې د امریکا یا اسرائیلو د هر نوي برید پر وړاندې سمدستي او سخت ځواب ورکړي.
خامنهیي د دغه هېواد له درېیو لوړپوړو پوځي قوماندانانو سره په لیدنه کې د ځواکونو د بشپړ جنګي چمتووالي غوښتنه کړې او ویلي یې دي، چې هر ډول ګواښ باید له جغرافیایي محدودیت پرته له اغېزمن او جدي ځواب سره مخ شي.
نوموړي ټینګار کړی «که دښمنان یو ځل بیا پوځي یا ترهګریز بریدونه وکړي، نو د دغو جګړو د پای ته رسېدو وخت او شرایط به د ایران وسلهوال ځواکونه او د ایران ملت ټاکي.»
د راپورونو له مخې، دا د جګړې له پیل راهیسې لومړی ځل دی، چې له مجتبی خامنهیي سره د دغه هېواد درې واړه لوړپوړي پوځي قوماندانان په یوه غونډه کې راټولېږي.
خامنهیي همداراز پوځي مشرانو ته سپارښتنه کړې، چې د خپلو اهدافو لېست تازه کړي او هغه ټول فزیکي او غیرفزیکي امکانات، چې د امريکا او اسرائيلو اړوند دي، د ایراني ځواکونو په اهدافو کې شامل کړي.
نوموړي د پوځي استخباراتو د پیاوړتیا، د کورنیو دفاعي وړتیاوو د پراخولو او د امنیتي جوړښت په برخه کې د نوې ټکنالوژۍ د کارولو غوښتنه هم کړې ده.
په دې غونډه کې د ايران وسلهوالو ځواکونو لوی درستیز تورن جنرال علي عبداللهي، د پوځ قوماندان تورن جنرال امیر خاتمي او د سپاه پاسداران قوماندان تورن جنرال احمد وحیدي ګډون درلود.
هغوی د فارس خلیج د ساحلي سیمو، د هرمز تنګي، د عمان سمندر او د ایران د شمال لوېدیځو او سوېل ختیځو پولو په اوږدو کې د پوځي چمتووالي په اړه خامنهیي ته معلومات ورکړي دي.