د ملي دفاع وزارت وایي، د مرکزي قطعاتو او سیمهییزو قول اردوګانو (۴۵۷) تنه سرتېري د عبدالله بن مسعود (رض) د جګړهییزو ګډو زده کړو قومندانۍ د پیاده، توپچي، زرهدار او دافع هوا کوروسونو له څلور میاشتنیو مسلکي زدهکړو څخه نن د یو لړ مراسمو په ترڅ کې فارغ شول.
په همدې موخه جوړو شویو مراسمو کې د ملي دفاع وزارت د تعلیماتو او پرسونل معینیت مرستیال، مولوي باز محمد حمیدي فارغانو ته د وینا پر مهال ویلي: «له حسد او تعصب څخه ځان وساتئ، تقوا غوره کړئ او د کلک عزم، قوي ایمان او عقیدې پر مټ د هېواد له سرحدونو څخه دفاع وکړئ.»
ورته مهال د عبدالله بن مسعود (رض) د جګړهییزو ګډو زده کړو قومندان مولوي نصیب الله مدني د ملي دفاع وزارت مسؤلینو ته ډاډ ورکړی او زیاته کړې یې ده چې، په دې قومندانۍ کې د مجربو او مسلکي استادانو له لوري روزل شوي توپچي ځواکونه د ستراتیژیکو پلانونو جوړولو او دقیقو بریدونو د ترسره کولو وړتیا لري چې د دښمن په ځپلو او د سرحدونو په ساتنه کې به اغېزمن ثابت شي.
د مراسمو په پای کې فارغانو مسؤلینو ته ډاډ ورکړی چې، د هېواد له خپلواکۍ، ځمکنۍ بشپړتیا او اسلامي ارزښتونو څخه به په مېړانه ساتنه کوي.