د کلیو بیارغونې او پراختیا وزارت له لوري د پکتیا ولایت په زرمت ولسوالۍ کې د شاوخوا ۲۳۶ میلیونه افغانیو په لګښت د ۱۶۹ پراختیايي پروژو چارې د یوې غونډې په ترڅ کې پیل شوې دي.
یاد وزارت په یوه خبرپاڼه کې ویلي چې، د دغو پروژو د چارو د پیل په پار جوړه شوې غونډه کې د کلیو د بیارغونې او پراختیا وزارت ویلي چې، یاد وزارت د متوازن انکشاف لپاره ژمن دی او د خپلو امکاناتو په پام کې نیولو سره د پروژو تطبیق یې د هېواد لرو پرتو سیمو ته جاري ساتلی دی.
د خبرپاڼې له مخې، په دغو پروژو کې د کلیوالي سړکونو، پلونو، پلچکونو، استنادي دیوالونو او کانالونو جوړول شامل دي.
د یادونې وړ ده چې، د دغو پروژو د چارو په جریان کې به سلګونه تنه کاریګرو ته د کار زمینه برابره او په بشپړیدو سره به يې په اړوندو برخو کې د زرمت ولسوالۍ د اوسیدونکو ستونزې هوارې شې.