د بهرنیو چارو وزارت سرپرست مولوي امیرخان متقي کابل کې د جاپان له سفیر تاکایوشي کورومایا سره په کتنه کې وروستیو ډیپلوماټیکو پرمختګونو ته په اشارې ویلي، له سيمې او نړۍ سره مو تعاملات ښه لور ته روان دي او سرپرست حکومت د خپل متوازن، نورو ته د ضرر نه رسولو او اقتصاد محوره پالیسۍ له مخې له ټولو لوریو سره ابرومندانه اړیکو ته لیواله دی.
د یاد وزارت د عامه اړیکو رئیس، حافظ ضیاء احمد تکل ویلي، دغه کتنه کې دواړو خواو پر دوه اړخیزو اړیکو، د جاپان پر همکاریو او نړۍوالو مسایلو په اړه خبرې کړې دي.
ښاغلي متقي وړاندې ویلي، دا مهال په افغانستان کې د سر تاسري امنیت په ټینګیدلو سره د پانګونې ګڼ فرصتونه رامنځته شوي دي او جاپان کولای شي چې په لویو پروژو کې پانګونه وکړي.
د ښاغلي تکل په وینا، د جاپان سفیر د نشهيي توکو د کښت او تولید پر وړاندې د پیاوړې مبارزې ستاینه کړې او د بدیل کښت په اړه یې د جاپان د همکاریو ډاډ ورکړی دی.
همداراز نوموړي د دوحې پروسې د کاري ګروپونو یادونه کړې او هیله یې څرګنده کړې چې د افغانستان او نړۍوالې ټولنې تر منځ ګډ کار به ښې پایلې ولري.