انادولو خبري اژانس راپور ورکړی، چې د امریکا ولسمشر ډونالډ ټرمپ ویلي، له اسراییلو سره د امریکایانو پراخ نفرت، له ایران سره د جګړې مخالفت او د تېلو د بیو لوړېدل د منځمهاله ټاکنو پر مهال د جمهوريغوښتونکو د ماتې مهم لاملونه وو.
ټرمپ له سيبياېس ټلوېزیون سره په مرکه کې ویلي، امریکایانو جګړه نه غوښتله او د تېلو د بیو له لوړېدو هم ناراضه وو. د نوموړي په وینا، د اسراییلو پر وړاندې د خلکو نفرت هم د جمهوريغوښتونکو پر ټاکنیزو پایلو اغېز کړی دی.
سره له دې، ټرمپ له ایران سره د جګړې د پیل پرېکړې دفاع کړې او ویلي یې دي، که بیا هم ورته وضعیت رامنځته شي، همدا پرېکړه به وکړي، ځکه د ده په وینا، ایران باید اټومي وسلې ترلاسه نه کړي.
هغه زیاته کړې، امریکا په جګړه کې بریالۍ شوې او تهران له واشنګټن سره یوې هوکړې ته لېوالتیا لري، خو ټرمپ ویلي چې د ټاکنو له امله خبرې اترې پېچلې شوې دي.
دا څرګندونې داسې مهال کېږي چې د تېرې اوونۍ په منځمهاله ټاکنو کې د ډیموکراټ ګوند د استازو جرګې او سنا دواړو کنټرول ترلاسه کړ.