د سرپرست حکومت د ویاند مرستیال ملا حمدالله فطرت وایي، د رئیس الوزراء ملا محمد حسن اخند په مشرۍ له افغان کډوالو سره د ناوړه چلند او د هغوی د جبري اخراج په اړه ځانګړې غونډه کې له افغان کډوالو سره د غیر اسلامي او غیر انساني چلند او د ټولو اصولو پر خلاف د هغوی جبري اخراج په کلکو ټکو غندل شوی او دغه کړنه یې د ټولو اسلامي ارشاداتو او نړیوالو اصولو او د ګاونډیتوب د حقوقو خلاف عمل بلل شوی دی.
د ښاغلي فطرت په وینا، په دغه غونډه کې د کابینې د نورو غړو تر څنګ د رئیس الوزراء اقتصادي مرستیال ملا عبدالغني برادر، اداري مرستیال مولوي عبد السلام حنفي، د کډوالو او بېرته را ستنېدونکو چارو وزیر مولوي عبد الکبیر ګډون کړی و.
ښاغلي فطرت زیاته کړې، همداراز دې غونډه کې د پاکستان له ولس، سیاسي ګوندونو، علماوو او بانفوذه شخصیتونو څخه غوښتنه شوې تر څو دوی هم په دې اړه خپل اسلامي او د ګاونډیتوب مسؤولیت اداء کړي.
غونډې پر ملګرو ملتونو او نړیوالو سازمانونو غږ کړی، چې د دغه انساني ناورین په مخنیوي او د افغان کډوالو په با عزته توګه را ستنېدو کې خپل مسؤولیت اداء کړي.
د ښاغلي فطرت په وینا، په دغه غونډه کې د مهاجرینو ستونزو ته د رسېدنې عالي کمېسیون ته دنده سپارل شوې، چې د تېر په څېر له خپلو ټولو موجوده امکاناتو څخه په هر اړخیزې ګټې اخیستنې راستانه شویو افغانانو ته لازمې اسانتیاوې، لنډمهالي هستوګنځي او خدمات ژر تر ژره برابر کړي.
د یادونې وړ ده چې، پاکستاني حکومت تازه له دغه هېواده د افغان کډوالو د جبري اخراج نوې لړۍ پیل کړې، چې د بشر حقونو سازمانونه دغه چاره نا عادلانه بولي او د دې لړۍ د درېدو غوښتنه کوي.
