د هندوستان لهخوا د سند سیند د اوبو تړون د ځنډولو له پرکړې وروسته پاکستان کې د کرنې د وضعیت او بشري فاجعې په اړه اندېښنې زیاتې شوې دي. څارونکو او کروندګرو خبرداری ورکړی چې که د سند سیند د اوبو بهیر بند شي، پاکستان به له پراخې وچکالۍ او د قحطۍ له ګواښ سره مخامخ شي.
د پاکستان د سند ایالت د لطیفاباد سیمې یو محلي کروندګر، هوملا ټاګور وايي: «که چېرې اوبه بندې شي، ټوله سیمه به په وچې صحرا بدله شي او موږ به له لوږې مړه شو.»
دا په داسې حال کې ده، چې په سند سیند کې د اوبو سطحه په بې ساري ډول ټيټه شوې او تېز سوځنده لمر حالت لاپسې خراب کړی.
پاکستان کې دبشري وضعیت په اړه دا اندېښنې وروسته له هغه لا پسې زیاتې شوې چې د هند د اوبو وزیر کشمیر کې پر سیلانیانو تر مرګوني برید وروسته وویل: «ډاډ درکوو چې پاکستان ته د سند سیند یو څاڅکې اوبه به هم ونه رسېږي.»
له بل لوري د چارو شنونکو خبرداری ورکړی چې په وروستیو کلونو کې د ورښتونو کموالی او د سند سیند د اوبو بندېدل کولی شي د پاکستان اقتصاد او د خلکو ژوند ته نه جبرانېدونکي زیانونه واړوي.