د عامې روغتيا وزير مولوي نور جلال جلالي د يوه خبري کنفرانس پر مهال افغانستان ته د بهرنيو مرستندويه بنسټونو په مرستو نيوکه کړې او په وينا یې د يادو بنسټونو له ډلې د خوړو نړيوال يا WFP شاوخوا ۶۷۵۰ میټریک ټنه د سوپر سیریل په نوم خوراکي توکي افغانستان ته وارد کړي، چې د کیفیت معیارونه پکې نه دي مراعات شوي او د استفادې وړ نه دي.
ښاغلي جلالي ويلي د خوړو نړیوال پروګرام، دغه راز ۵۵ میټریک ټنه پریمیکس مواد د ظرفیت په پام کې نیولو نه پرته افغانستان ته وارد کړي، چې تاریخ یې تېر او ضایع شوي دي چې دا د مرستو ښکاره ضایع کېدل ښيي.
د عامې روغتيا وزير ويلي پر دې سربېره د ملګرو ملتونو پراختیایي پروګرام يا UNDP هم د توبرکلوز ۶۵۰ تشخیصیه کېټونه وارد کړي چې اسناد یې له واقعي موادو سره مطابقت نه لري او د ځینو یې تاریخ تېر دی کې یادې ادارې خپله دا تېروتنه منلې ده.
نوموړي له مرستندویه بنسټونو غوښتي، چې خپلې مرستې په شفاف ډول، مسؤلانه او د اړتیاوو له مخې مدیریت کړي.
ښاغلي جلالي همدا راز ډاډ ورکړی چې د عامې روغتيا وزارت هېواد ته په راواردېدونکو او دننه جوړېدونکو درملو بشپړ څار لري او په تېرو شپږو مياشتو کې ۱۳۹ ټنه بې کيفيته درمل له منځه وړل شوي.