د بهرنیو چارو وزارت د عامه اړیکو رئیس په یوه خبرپاڼه کې ویلي، چې د دغه وزارت مالي او اداري مرستیال ډاکتر محمد نعیم کابل کې د ترکیې له سفیر جنګ اونال سره کتلي.
د خبرپاڼې له مخې، په دې کتنه کې د دواړو هېوادونو د اړیکو پر پراختیا، د راستنېدونکو کډوالو په ستونزو او یوشمېر نورو دوهاړخیزو موضوعاتو خبرې شوي.
ډاکتر محمد نعیم د افغانستان او ترکیې اړیکې له دیني، سیاسي، کلتوري او تاریخي پلوه ژورې او نه شلېدونکې بللي او د ترکیې له هر اړخیزو همکاریو د مننې ترڅنګ د راستنېدونکو کډوالو سره يې د مرستو دوام غوښتنه کړې.
له بل لوري کابل کې د ترکیې سفیر جنګ اونال د اړیکو د پراخېدو هيله څرګنده کړې او له افغانستان سره په بېلابېلو برخو کي د ښکیلتیا په اړه معلومات او برنامې شریکې کړي.