پاکستاني طالبان وايي، پرون ورځ د اګست ۱۴مه چې پاکستان د خپلې ازادۍ د ورځې په توګه نومولې او نمانځنه یې کوله، دوی د پاکستان په بېلابېلو امنيتي ادارو ۷۸ بريدونه ترسره کړي، چې په ترڅ کې یې ګڼ شمېر پوليسو او پوځيانو ته مرګژوبله اړولې او د پوځي وسايطو د تخريب سربېره یې ځينې پوستې هم نيولې دي.
د پاکستاني طالبانو په دې بريدونو کې تر ټولو ستر بريد د شمالي وزيرستان په سپين وام ولسوالۍ کې سيمې ته د چاپې په نيت په ورغليو پوځيانو شوی، چې په ترڅ کې یې ۸ پوځيان وژل شوي او ګڼ نور ټپيان دي.
په شويو ۷۸ بريدونو کې ډېری هغه یې په شمالي وزیرستان، جنوبي وزيرستان، ټانک، مومندو، بنو، کورم، دېره اسماعيل خان او دير ولايتونو کې شوي دي.
پاکستاني طالبانو د يادو بريدونو په لړ کې په يوه بل بريد کې چې د بنو ولايت په ميريان ولسوالۍ کې یې کړی، د هشتادو دو او ليزري ټوپکو پر مټ يوه پوسته په نښه کړې او په بشپړ ډول ېې له منځه وړې ده.
د يادولو ده، چې په ټولو شويو بريدونو کې پاکستاني حکومت ته ګڼ شمېر زيانونه اوښتي، چې د پوځيانو له وژل کېدو او نيول کېدو سربېره یې ګڼ شمېر پوځي وسايط هم تخريب او ځينې وسلې هم د پاکستاني طالبانو لاسته لوېدلې دي.