انادلو خبري اژانس راپور ورکړی، چې د امریکا ولسمشر ډونالډ ټرمپ ویلي، که ایران د واشنګټن په نښه کولو لپاره د راډیواکټیف موادو لرونکي «ککړ بم» د جوړولو هڅه وکړي، امریکا به یې پر وړاندې پوځي اقدام وکړي.
د راپور له مخې، ټرمپ د جمعې په ورځ په سپینه ماڼۍ کې خبریالانو ته ویلي، داسې اوازې شته چې ایران د ککړ بم د جوړولو هڅه کوي او که دا کار وکړي، امریکا به ورسره جګړه وکړي. نوموړي زیاته کړې، واشنګټن د ایران فعالیتونه له نږدې څاري او د دغه هېواد په اړه پراخ استخباراتي معلومات لري.
دا څرګندونې وروسته له هغې کېږي چې CNN د اوو امریکايي چارواکو له قوله راپور ورکړی و، چې ګواکې ایران په واشنګټن کې د ټرمپ د ادارې د لوړپوړو چارواکو د په نښه کولو لپاره د ککړ بم یا کیمیاوي وسلو د کارولو احتمالي پلانونه ارزوي.
خو د CNN د راپور له مخې، امریکايي چارواکي په دې اړه اختلاف لري چې ایران د داسې برید د عملي کولو وړتیا لري او که نه؛ سپینې ماڼۍ هم ویلي چې دا مهال د امریکا خاورې ته کوم باوري ګواښ نشته.


