د امريکا ولسمشر ډونالډ ټرمپ د چين په پلازمېنه بیجینګ ښار کې د چين د بريا او آزادۍ ورځې د لمانځنې په مناسبت د ستر پوځي پرېډ له پيل کېدو سره هممهاله د روسیې چين او شمالي کوریا مشران د امريکا پر وړاندې په توطئو جوړولو تورن کړي او پر دې سربېره یې چين ته د «یوه ستر او نه هېریدونکي جشن ورځ» غوښتنه کړې ده.
ټرمپ په کنايوي ډول په خپله رسنۍ «ټروث سوشيال» ليکلي «زما ګرم سلامونه ولادیمیر پوتین او کیم جونګاون ته ورسوئ.»
نوموړي همدا راز ويلي «لویه پوښتنه دا ده چې د چین ولسمشر به په دې جشن کې د هغې وینې توېدو او سترې مرستې یادونه وکړي که نه، چې امريکا د چین د آزادۍ لپاره کړې وه.»
د امریکا ولسمشر ټینګار کړی چې ډېرو امریکایانو د چین د هڅو په ملتیا، د جاپان پر وړاندې د بري او ویاړ د ترلاسه کولو په لاره کې خپل ژوند له لاسه ورکړی.
ياده دې وي، چې د روسیې ولسمشر ولادیمیر پوتین، د شمالي کوريا ولسمشر کیم جونګاون، د چين ولسمشر شيجینپینګ او ځینو نورو نړیوالو مشران نن چهارشنبه د چين د بريا ورځې په مناسبت پوځي پرېډ کې په سره فرش په مسکا تېر شول.