د ریاستالوزراء اقتصادي مرستیال ملا عبدالغني برادر د هېواد شمالي ولایتونو ته د سفر پرمهال د سرپل ولایت په بلخاب ولسوالۍ کې په مسلکي ډول د بلخاب ډبرو سکرو کان د استخراج او د کانونو ترمنځ د نښلېدونکو سړکونو پرانیسته وکړه.
د ریاستالوزراء اقتصادي مرستیالۍ د خبرپاڼې لهمخې، ښاغلي برادر د دې کان د پرانیستې په مراسمو کې ویلي، چې افغانستان د بېلابېلو طبیعي زېرمو له اړخه غني هېواد دی او دغه زېرمې د اوږدمهاله زېربنايي پروژو د تمویل، د صنعتي پرمختګ او د ملي عوایدو د سترې سرچینې په توګه له اساسي او ستراتیژیک ارزښت څخه برخمنې دي، چې د مسلکي استخراج له لارې به د هېواد د چټک اقتصادي او ټولنیز پرمختګ لامل شي.
نوموړي زیاته کړې، چې د بلخاب د ډبرو سکرو کاني حوزه د هېواد له مهمو او غني زېرمو څخه ده، چې د ملي پراختیا شرکت له لوري یې د استخراج پروسه تر دې دمه ښه روانه ده.
د ریاستالوزراء اقتصادي مرستیال دغه راز د بلخاب ولسوالۍ اوسېدونکو ته ډاډ ورکړ، چې د دوی د اړتیا وړ د ډبرو سکاره به په کمه بیه دوی ته ورکول کېږي او همداراز به دوی ته د سړکونو، روغتونونو او نورو برخو کې ټولنیز خدمتونه لا زیات شي.
د یادونې ده، چې اوسمهال له دوه زره زیات هېوادوال په مستقیم ډول په دغه کان کې په کار بوخت دي او په کلني ډول ترې ۵۰۰ زره ټنه سکاره استخراجیږي.