الميادين رسنۍ په يوه راپور کې ويلي،چې دوحه کې د عربي او اسلامي هېوادونو د بهرنيو چارو وزيرانو د نن ورځې بېړنۍ غونډه کې د قطر امنيت د ټولو عربي او اسلامي هېوادونو د امنيت نه جلا کېدونکې برخه بلل شوې ده.
سرچينې ويلي، دا ناسته چې نن د يکشنبې ورځ په دوحه کې جوړه شوې وه د عربي-اسلامي هېوادونو د سبا دوشنبې ورځې د فوق العاده سرمشريزې لپاره پکې په مهمو موضوعاتو بحثونه شوي دي.
د معلوماتو له مخې ګډونوالو په ګډه ويلي، چې پر قطر د اسرائيلي رژيم وروستی بريد د نړيوالو قوانينو ښکاره سرغړونه ده او په وينا یې دا عمل د سيمې او نړۍ د ثبات لپاره خطرونه زېږوي.
له غونډې وروسته د قطر د بهرنيو چارو وزارت وياند ماجد الانصاري ويلي، دا ناسته د عربي او اسلامي هېوادونو د پراخې همغږۍ څرګندونه کوي او په خبره یې په دې غونډه کې پر قطر د اسرائيلي رژيم د بريد پر وړاندې د اسلامي او غربي هېوادونو د سبا ورځې نشرېدونکې اعلاميه او ګډ دريځ تر بحث لاندې نيول شوی.
له بل لوري بیا د عرب ليګ هېوادونو د سرمنشي وياند، جمال رشدي هم ټينګار کړی، چې دا ناسته له قطر سره د بشپړ يووالي او ملاتړ پيغام لېږدوي او په وينا یې د اسرائيلي رژيم «بېپروا او بزدلانه بريد» ته بايد عملي او سياسي ځواب ورکړل شي.
په غونډه کې د اسلامي او عربي هېوادونو د وروستۍ اعلاميې مسوده هم تر بحث لاندې نيول شوې او ټاکل شوې دا اعلاميه سبا ورځ تصويب او رسماً اعلان شي.
ياده دې وي، چې اسرائيلي رژيم د تېرې سهشنبې ورځ د قطر پلازمېنه دوحه کې د حماس غورځنګ د مشرتابه د مرکچي پلاوي د ناستې پر ځای بريد وکړ؛ خو بريد ناکامه او د حماس غورځنګ مشران ترې روغ ووتل.