حماس غورځنګ د ملګرو ملتونو عمومي غونډې ته د ډونالډ ټرمپ د وینا په غبرګون کې ویلي، چې دا غورځنګ هېڅکله هم د غزې په تړانګه کې د اوربند د هوکړې خنډ شوی نه دی، بلکې هر اړخیزه نرمښت او مثبت چلند یې کړی دی.
دغه غورځنګ زیاته کړې، چې امریکا منځګړي هېوادونه او ټوله نړۍ پوهېږي چې د جګړې مجرم نتنیاهو د هوکړې د هرې هڅې یوازینی خنډ دی.
حماس غورځنګ دغه راز د ملګرو ملتونو د عمومي غونډې په څنډو کې د عربي اسلامي هېوادونو غونډې په اړه ویلي، موږ د غونډې هرکلی کوو، چې د اوربند، د اشغالګرو وتلو او د بندیانو تبادلې لپاره یې د عملي ګامونو غوښتنه کړې ده.
دغه غورځنګ وړاندې ویلي، د مقاومت وسله د ملت حق دی، چې نړیوال قوانین یې هم مني او تر هغې به دوام کوي، تر څو اشغال پای ته ورسېږي او د فلسطین لپاره «قدس» پلازمېنه جوړه شي.