انادولو خبري اژانس راپور ورکړی، چې د غزې په جنوبي ښار خانیونس کې پر ناصر روغتیايي کمپلیکس د اسرائیلي رژیم د هوايي برید له امله شپږ فلسطینیان شهیدان شوي او تر ۲۰ ډېر نور ټپیان شوي دي.
د راپور له مخې، برید د پنجشنبې په سهار د ناصر روغتون د الیاسین ودانۍ پر دویم پوړ شوی، چې له امله یې د روغتون د جدي پاملرنې او جراحي څانګو ته هم پراخ زیانونه اوښتي دي.
راپور زیاتوي، چې د چهارشنبې په ورځ هم د غزې ښار او البریج کډوالو پنډغالي کې د اسرائیلي رژیم په بریدونو کې پنځه فلسطینیان شهیدان شوي وو او یو بل کس چې د سهشنبې په برید کې ټپي شوی و، وروسته ساه ورکړې ده.
د انادولو د راپور له مخې، د ۲۰۲۵ کال د اکتوبر په ۱۰مه د اوربند له پلي کېدو راهیسې د اسرائیلي رژیم په بریدونو او سرغړونو کې ۱۶۲۲ فلسطینیان شهیدان شوي او ۵۸۷۸ نور ټپیان شوي دي.
دغه راز د ۲۰۲۳ کال له اکتوبر راهیسې پر غزې د اسرائیلي رژیم د یرغل په پایله کې د شهید شویو فلسطینیانو شمېر له ۷۴ زرو او ۶۰۰ اوښتی او د ټپیانو شمېر نږدې ۱۷۶ زرو ته رسېدلی، چې ډېری یې ښځې او ماشومان دي. د راپور له مخې، جګړې د غزې شاوخوا ۹۰ سلنه زیربناوې هم ویجاړې کړې دي.