د پاکستاني پوځ پخواني افسر او اوسني څيړنيز خبريال عادل راجا چې دا مهال په لندن کې اوسېږي د افغان حکومت له لوري د امريکايي وګړي امير اميري خوشې کولو ته په اشارې ويلي، چې «طالبان» د امريکايي بندیانو د خلاصون په بدل کې له امريکا څخه خپل بندیان غواړي؛ خو پاکستاني پوځ پرې خپل خلک خرڅوي.
نوموړي ويلي «زموږ د کرايي پوځ جنرالان خپل هېوادوال د ډالرو په بدل کې په امريکا پلوري او هغه ډالر خپلو جېبونو ته اچوي.»
هغه ويلي، وروستي راپورونه ښيي، چې افغان حکومت د امیر امیري په نوم يو بندي خوشې کړی او په بدل کې يې له امريکا څخه ګوانتانامو کې د افغان بندي «محمد رحيم» غوښتنه کړې ده، چې په راتلونکو ورځو کې به ورته وسپارل شي.
عادل راجا د پاکستان په حکومت توندې نيوکې کړي او د پېغور په شکل یې ليکلي، چې د پاکستان پوځ جنرالانو بېګناه وګړي لکه «عافیه صدیقي» او «سیف الله» په امريکا پلورلي او د ملت شتمنۍ او خلک په ارزانه بیه خرڅوي.
هغه په پای کې پوښتنه کړې ده، «نو اوس تاسو خپله پرېکړه وکړئ، د خپل هېواد سره څوک ډېر مخلص دي؟ د افغانستان طالبان که د پاکستان لالچي جنرالان او افسران؟.»
ياده دې وي، چې افغان حکومت پرون ورځ افغانستان کې بندي امريکايي تبعه امير اميري خوشې کړ او اوس سرچينې وايي، ټاکل شوې چې په بدل کې به یې په ګوانتانامو کې وروستی افغان بندي محمد رحيم ډېر ژر خوشې او افغانستان ته راستون شي.
محمد رحيم چې په ګوانتانامو کې وروستی افغان بندي دی، د امريکا استخباراتي ادارې «سيایاې» یې خوشې کول د ځان لپاره سره کرښه ګڼلې وه؛ خو اوس ښکاري چې دا سره کرښه هم په ماتېدو ده.