د ایران د بیړني حالت ادارې پر دې هېواد د امريکا او اسرائيل د وروستیو بريدونو په پایله کې د نږدې ۵۰۰۰ ښځو د ټپي کیدو راپور ورکړی دی.
د دې ادارې مشرې «میادفر» ويلي چې ۴۹۹۳ ښځې ټپیانې شوي او ۲۵۸ نورې وژل شوې دي. هغې ټینګار کړی چې دې ښځو په نظام او یا هم جګړه کې هېڅ ډول رول نه درلوده.
د خپرو شويو معلوماتو پر اساس په دې بريدونو کې له ۱۸ کلونو څخه کم عمر لرونکي ۲۱۱۵ ماشومان ټپیان شوي، چې ۱۲۴ یې د ۵ کلونو څخه کم عمر لرونکي وو او ۷۰ نورو یې له ۲ کلونو څخه کم عمر درلوده.
پر وژل شويو ښځو سربېره په ياده جګړه کې لږ تر لږه ۲۲۱ ماشومان وژل شوي، چې ۱۸ یې د ۵ کلونو څخه کم عمر لرونکي وو.
د يادو بريدونو پر مهال په تهران، خوزستان، لرستان، اصفهان، کرمانشاه او ایلام کې تر ټولو ډیرې وژونکې پيښې ثبت شوې دي.
پر عامو خلکو سربېره ۱۱۸ روغتیايي کارکونکي هم ټپیان او ۲۶ نور وژل شوي دي.