بریتانوۍ رسنۍ انډپنډنټ راپور ورکړی، چې د مالي په مرکزي سیمه کې د سان ښار پر یوې پوځي اډې د القاعدې وسلهوالو په برید کې لږ تر لږه ۱۰ سرتېري وژل شوي دي.
د راپورونو له مخې، برید د یکشنبې سهار شاوخوا ۵:۳۰ بجې ترسره شوی او د درنو چاودنو او ډزو غږونه اورېدل شوي دي. امنیتي سرچینې وايي، وسلهوالو د لنډ وخت لپاره د پوځ پر اډې کنټرول ترلاسه کړی و.
د «نصرة الاسلام والمسلمین» ډله، چې د القاعدې له شبکې سره تړاو لري، د برید مسوولیت یې منلی او ادعا یې کړې، چې د سان ښار پوځي اډه یې په بشپړ ډول نیولې وه، خو د مالي پوځ ویلي چې برید یې په کلکه دفع کړی او وضعیت تر کنټرول لاندې دی.
په مالي کې له ۲۰۱۲ کال راهیسې د وسلهوالو ډلو فعالیتونو د دغه هېواد امنیتي وضعیت له جدي ننګونو سره مخ کړی دی. د تېرې جولای میاشتې په ۱۸مه هم د یاد هېواد په شمال کې پر یوه پوځي کاروان برید کې لږ تر لږه ۵۰ سرتېري وژل شوي وو.