ټاس خبري اژانس راپور ورکړی، چې د روسیې د بهرنیو چارو وزیر سرګي لاوروف خبرداری ورکړی، که اروپايي هېوادونه پر روسیه برید وکړي، جګړه به ډېره لنډه وي او اروپا به په کې ماتې وخوري.
لاوروف ویلي، روسیه پر اروپايي هېوادونو د برید اراده نه لري، خو که پر روسیه برید وشي، مسکو به سخت ځواب ورکړي. نوموړي زیاته کړې چې د اوکراین د جګړې اړوند اوس د خبرو اترو پر ځای د جګړې په ډګر کې پرمختګ روان دی.
د روسیې د بهرنیو چارو وزیر همدارنګه ادعا کړې چې لویدیځو هېوادونو په ۲۰۲۲ کال کې د استانبول د خبرو د هوکړې مخه ونیوله او د اوکراین د جګړې د پای ته رسېدو فرصت یې له منځه یووړ.
لاوروف د تور سمندرګي د غلو د صادراتو د پخوانۍ هوکړې د بیا فعالېدو طرحه هم د روسیې لپاره «د نه منلو وړ» بللې ده.