د مهاجرینو ستونزو ته د رسېدنې عالي کمېسیون دارالانشاء ویلي، چې د جمعې په ورځ ۱۹۲ کورنۍ، چې ۸۸۷ تنه کېږي، د تورخم، سپین بولدک، ورېښمو پل او اسلامکلا له لارو افغانستان ته راستنې او ثبت شوې دي.
د راپور له مخې، له راستنېدونکو ۱۲۷ کورنیو سره ټولټال ۹۵۰ زره افغانۍ نغدي مرسته شوې او له سپین بولدک او کابل څخه ۳۹ کورنۍ، چې ۲۰۷ تنه کېږي، بېلابېلو ولایتونو ته لېږدول شوې دي. د لېږد لپاره پر دغو کورنیو شاوخوا ۱۹۳ زره افغانۍ د ترانسپورټ کرایه هم وېشل شوې ده.
همدارنګه راستنېدونکو ته خوراکي، روغتیايي او مخابراتي خدمتونه وړاندې شوي، ۱۱۶ سیمکارتونه وېشل شوي او ۱۴۴۱ ناروغان درملنه شوي دي. د عامه پوهاوي کمېټې هم راستنېدونکو ته د ثبت، مالي مرستو، لېږد او لنډمهاله مېشتېدنې په اړه معلومات ورکړي دي.