دفاع وزارت په یوه خبرپاڼه کې ویلي، چې د یاد وزارت وزیر مولوي محمد یعقوب مجاهد د شهید سردار محمد داود خان ۴۰۰ بستریز کمپلکس روغتون له تازه فعال شویو څانګو لیدنه کړې او د دغو څانګو فعالیتونه یې کتلي.
خبرپاڼه زیاتوي، چې مولوي محمد یعقوب مجاهد د روغتیایي چارو له قوماندان ډاکټر محمد طاهر احرار او یو شمېر نورو مسوولینو سره یوځای د نظامي طب پوهنځي، لابراتوارونو، درسي خونو، کتابتون، ایمیجنګ سنټر، د زړه نوي مرکز، VIP څانګې، ټیليمېډیسن او نورو برخو څخه لیدنه کړې.
خبرپاڼه کې راځي، چې په دې لیدنه کې د روغتون د متخصصو ډاکټرانو لپاره ځانګړې غونډه هم جوړه شوې وه، چې دفاع وزیر د اسلامي اردو د منسوبینو د درملنې په برخه کې د ډاکټرانو خدمتونه ستایلي، د هغوی ستونزې یې اورېدلي او د حل او پرمختګ په برخه کې یې د همکارۍ ډاډ ورکړی.