د ایران د بهرنیو چارو وزارت ویاند اسماعیل بقايي وايي، تهران د هغو راپورونو په اړه اندېښمن دی چې ګواکې پاکستان سعودي عربستان ته د یمن په جګړه کې د ګډون لپاره لسګونه زره سرتېري استوي.
بقايي د یکشنبې په ورځ په تهران کې خبري غونډې ته ويلي، هیله لري سعودي عربستان ته د پاکستان د ۴۰ زره سرتېرو د استولو راپورونه اوازې وي، ځکه د ده په وینا، د یمن په بحران کې د هر ډول نوې پوځي لاسوهنې زیاتېدل به وضعیت لا پېچلی کړي.
رویټرز بیا د پاکستاني ځواکونو د حضور په اړه د یوه پاکستاني چارواکي له قوله راپور ورکړی، چې د سعودي عربستان په خاوره کې له ۳۰ تر ۴۰ زرو پورې پاکستاني پوځیان ځای پر ځای شوي دي.
د راپور له مخې، د دغو ځواکونو دنده د سعودي د پولو ساتنه، د هوايي دفاع پیاوړتیا او د بېپیلوټه الوتکو او توغندیزو بریدونو مخنیوی بلل شوی دی.
د ایران د بهرنیو چارو وزارت ویاند د پاکستان، ترکیې او سعودي عربستان د ګډ دفاعي تړون په اړه هم خبرداری ورکړی او ویلي یې دي، چې دغه تړون باید د اسلامي هېوادونو د ګټو پر خلاف ونه کارول شي.