د بلخ ولایت رسنیو دفتر په یوه خبرپاڼه کې ویلي، چې د شمال لوېدیځ زون د پنځو ولایتونو (بلخ، جوزجان، سرپل، سمنګان او فاریاب) د مسوولینو د همغږۍ غونډه د فاریاب په مرکز میمنه ښار کې د بلخ د والي ملا محمد یوسف وفا په مشرۍ
ترسره شوه، چې پکې د امنیتي وضعیت، اداري اصلاحاتو، د ولسي ستونزو د حل او د کاري فرصتونو د برابرولو په اړه خبرې شوي.
خبرپاڼه زیاتوي، چې په دې غونډه کې د پنځو ولایتونو والیانو، امنیه قومندانانو، د ۲۰۹ الفتح قول اردو مرستیال، د شمال زون د نظامي محکمې رئیس او د استخباراتو مسوولینو ګډون درلود.
دوی د خپلو ولایتونو د امنیتي وضعیت او جنايي پېښو راپورونه وړاندې کړي او د جنايي پېښو د مخنیوي لپاره یې د عامه پوهاوي پر پراختیا ټینګار کړی.
همدارنګه د ولایتونو ترمنځ د سرحدي سیمو د همغږۍ پیاوړتیا، د مسوولینو او کارکوونکو لپاره د اصلاحي سیمینارونو جوړول، له ۲۰۰ تنو علماوو سره مشورتي ناستې، د لویو لارو او ښارونو د امنیتي پوستو معیاري کول او د دولتي او خصوصي سکټور له لارې د کاري فرصتونو برابرول د غونډې د بحث مهم موضوعات وو.
خبرپاڼه کې راځي، چې په غونډه کې د بلخاب، البدر، درهصوف بالا او پایین او یکاولنګ ولسوالیو په غرنیو سیمو کې د ۳۶۰ کیلومتره سړک جوړولو د شوې ژمنې د تعقیب پرېکړه هم وشې او د بلخ والي ټینګار کړی، چې مسوولین باید خپلې نیمګړتیاوې او د خلکو ستونزې په صادقانه ډول شریکې کړي، ترڅو ورته حل لارې ورته ولټول شي.