بهرنیو چارو وزارت په یوه خبرپاڼه کې ویلي، چې د یاد وزارت وزیر مولوي امیرخان متقي د اسلامي همکاریو سازمان (OIC) د سرمنشي له مرستیال، سفیر طارق علي بخیت، سره لیدلي او د افغانستان او سیمې پر وضعیت، سیاسي او اقتصادي پرمختګونو او د دواړو لورو ترمنځ د همکاریو پر پراختیا یې خبرې کړې دي.
د بهرنیو چارو وزارت د معلوماتو له مخې، په دې لیدنه کې د اسلامي همکاریو سازمان د نوي سرمنشي د ټاکل کېدو له امله مبارکي وړاندې شوې او د دغه سازمان په لیدلوري کې د افغانستان پر مهم ځای او له افغانستان سره پر رغنده تعامل ټینګار شوی.
دغه راز دواړو لورو د افغانستان او اسلامي همکاریو سازمان ترمنځ د اړیکو د لا پیاوړتیا او په بېلابېلو برخو کې د همکاریو لپاره د نویو لارو د پرانیستلو پر اهمیت ټینګار کړی.