رویټرز خبري اژانس راپور ورکړی، وروسته له هغه چې پاکستان له ایران سره خپلې دوه سوداګريزې لارې وتړلې؛ اوس ايران دغه هېواد ته د مايع ګازو (LPG) صادرات درولي دي.
د راپور له مخې، پاکستان هره ورځ شاوخوا ۷ زره مټریک ټنه ګاز له ایران څخه واردول، چې د ایران دې پرېکړې په دغه هېواد کې د ګازو کمښت په بې ساري ډول زیات کړی او بیې یې په چټکۍ سره لوړې کړې دي.
سرچینه زیاتوي، چې پاکستان کې د ۱۲ کیلوګرامه LPG ګاز ډبې بیه له ۱۶.۲ ډالرو څخه ۲۵.۳ ډالرو ته لوړه شوې، چې له ۵۵ سلنې څخه ډېر زیاتوالی ښيي.
د دواړو هېوادونو ترمنځ سوداګريزې اړيکې وروسته له هغې د جدي ترينګلتيا پر لور روانې دي، چې پاکستان له ايران سره خپلې دوه لارې د نامعلومو دلایلو له امله وتړلې.
له سوداګرۍ ورهاخوا ايران کې د پاکستان د منځګړيتوب په اړه هم جدي بحثونه روان دي او پر دې هېواد تور پورې کوي چې د امريکا ګټو ته کار کوي.