نړیوال بانک وايي، په پاکستان کې د بېوزلۍ کچه په ۲۰۲۴ او ۲۰۲۵ کلونو کې ۲۹ سلنې ته لوړه شوې او شاوخوا ۷۲.۶ میلیونه وګړي د بېوزلۍ تر کرښې لاندې ژوند کوي.
د راپور له مخې، د دغه هېواد ۲۱۸.۸ میلیونه وګړي، چې د ټول نفوس ۸۷.۱ سلنه جوړوي، هره ورځ له ۸.۳۰ ډالرو څخه په کم عاید ژوند کوي.
نړیوال بانک د بیو لوړوالی، اقتصادي رکود او د خلکو د عایداتو کمښت په پاکستان کې د بېوزلۍ د زیاتېدو عمده لاملونه بللي دي.
راپور زیاتوي، د خوراکي توکو، برېښنا، ګازو او تېلو د بیو لوړېدو تر ټولو ډېر ټیټ عاید لرونکي او بېوزله وګړي اغېزمن کړي دي.