انادولو خبري اژانس راپور ورکړی، چې د امریکا ماموریت په سعودي عربستان کې خپلو وګړو ته خبرداری ورکړی چې د یمن د حوثيانو او سعودي عربستان ترمنځ د کړکېچ له زیاتېدو سره سم، د دغه هېواد پر هوايي ډګرونو او مهمو زېربناوو د احتمالي بریدونو او د الوتنو د ګډوډېدو خطر شته.
د راپور له مخې، په سعودي عربستان کې د امریکا ماموریت ویلي، د ایران په ملاتړ حوثیانو پر سعودي عربستان، په ځانګړي ډول ملکي هوايي ډګرونو او مهمو زېربناوو بریدونه کړي، چې له امله یې ملکي وګړو ته مرګژوبله او د تګ راتګ په برخه کې جدي ستونزې رامنځته شوې دي.
دغه ماموریت خبرداری ورکړی چې وضعیت ښايي په چټکۍ سره پراخ شي او امریکايي وګړي باید د هوايي ډګرونو د احتمالي بریدونو، د هوايي حریم د تړل کېدو، د الوتنو د لغوه کېدو او د سفرونو د ګډوډۍ احتمال په پام کې ونیسي.
دا خبرداری په داسې حال کې ورکول کېږي چې د یمن حوثیان او د سعودي عربستان په مشرۍ ائتلاف ترمنځ نښتې زیاتې شوې دي.