انادولو خبري اژانس راپور ورکړی، چې د امریکا ولسمشر ډونالډ ټرمپ ویلي، له منځمهاله ټاکنو وروسته پر ایران د بیا پوځي برید په اړه فکر نه کوي او ټینګار یې کړی چې له تهران سره ډیپلوماټیکې هڅې د پرمختګ په حال کې دي.
د راپور له مخې، ټرمپ په واشنګټن کې یوې ټاکنیزې غونډې ته د وینا پر مهال، د ایران پر وړاندې د بیا برید د احتمال په اړه د یوې پوښتنې په ځواب کې «نه» ویلي دي. نوموړي زیاته کړې چې ایران به هېڅکله اټومي وسلو ته لاسرسی ونه لري او له رایهورکوونکو یې غوښتي چې د ایران د اټومي پروګرام د مخنیوي لپاره د هغه د ادارې هڅې په پام کې ونیسي.
ټرمپ له اکسیوس رسنۍ سره په جلا مرکه کې ویلي چې له ایران سره د مستقیمو پوځي بریدونو د بیا پیلولو په اړه پرېکړې ته بیړه نه لري او اړیکې یې له تهران سره ښې روانې دي. هغه ادعا کړې چې د امریکا فشارونو د ایران اقتصاد سخت کمزوری کړی او ایران تر بل هر وخت ډېر هوکړې ته لېواله دی.
دا څرګندونې وروسته له هغې کېږي چې د راپورونو له مخې، د اسرائیلو لومړي وزیر بنیامین نتانیاهو له ټرمپ سره په ټیلیفوني خبرو کې له منځمهاله ټاکنو وروسته پر ایران د سمدستي برید غوښتنه کړې وه، خو ټرمپ پرېکړه کړې چې ډیپلوماټیکو خبرو ته د دوام فرصت ورکړي.