انادولو خبري اژانس راپور ورکړی، چې د غزې په مرکزي سیمه کې د یوه زیانمن شوي ودانۍ دېوال د بېځایه شویو فلسطینیانو پر خېمه نړېدلی چې له امله یې څو کسان ټپیان شوي دي.
د راپور له مخې، پېښه د نصیرات کډوالو کمپ د «ارض المفتی» په سیمه کې شوې او د ټپیانو کره شمېر او د هغوی د ټپونو کچه لا نه ده معلومه.
دا پېښه یوه ورځ وروسته له هغې رامنځته شوې چې د دیرالبلح په سیمه کې د ځمکې ښویېدنې له امله د دوو ښځو او درېیو ماشومانو په ګډون پنځه فلسطینیان مړه او یو شمېر نور ټپیان شول.
د راپور له مخې، وروستیو توپانونو او سختو بارانونو په غزه کې تر ۷۰ زرو ډېرې بېځایه شویو کورنیو خېمې زیانمنې کړې او د ژمي په رانږدې کېدو سره د زرګونو کورنیو د اوسېدو ستونزې لا زیاتې شوې دي.