د تش په نوم متحدې جبهې مشر سمیع سادات په یوه اعلامیه کې د یادې تش په نوم جبهې د نیول شوي غړي الله داد فدايي نیول کېدل په داسې مهال تائید کړل، چې یوه ورځ وړاندې یې له غړیتوب انکار کړی و او له یاد قومندان سره د نوموړي غږیز کليپونه یې جعلي بللي و.
دغې خیالي جبهې تازه په یوه خبرپاڼه کې ویلي، چې نوموړی یې د جبهې غړیتوب لري او د افغان حکومت له بنده یې د خلاصون په هڅه کې دي.
د یادې تش په نوم متحدې جبهې ډلې غړي الله داد فدايي په یوه ويډیويي پیغام کې د دې ډلې په غړیتوب پښېماني ښودلې او د دې جبهې مشر او ورته نورې ډلې یې د پاکستان پوځي رژیم په ملاتړ د واک ترلاسه کوونکي بللي دي.
نوموړي په خپل ويډیويي پیغام کې زیاته کړې، چې دا وطن امن دی او هغوی چې ځوانان او دا ډول خلک وران کارو فعالیتونو ته هڅوي، دوی په خارج کې په عیش او نوش بوخت دي او دلته پردي زامن د مرګ خولې ته ورولي.
هغه له خلکو غوښتي دي، چې د افغانستان د ورانولو لپاره د دا ډول خلکو د کاذبو وعدو او شعارونو ښکار نهشي او ځانونه ترې وساتي.