د رويټرز د راپور له مخې، د امریکا ولسمشر ډونالډ ټرمپ د قطر له لومړي وزیر او بهرنیو چارو وزیر محمد بن عبدالرحمن آل ثاني سره په خبرو کې ویلي، چې له ایران سره جګړه پای ته نږدې شوې او د ده په وینا، اسرائیل او منځنی ختیځ نور د ایران له ګواښونو سره نه دي مخ.
ټرمپ پر خپله ټولنیزه شبکه «تروث سوشیل» لیکلي، چې قطر، سعودي عربستان، بحرین، کویټ او متحده عربي امارات د ایران پر وړاندې د سمندري محاصرې د دوام او د «اوسپنې دروازې» په نوم د نوي عملیاتو غوښتونکي دي.
نوموړي زیاته کړې، که په منځني ختیځ کې هر ډول تحرک ولیدل شي، امریکا ورته د ځواب ویلو لپاره چمتو ده.
د ټرمپ په وینا، د سیمې ټول هېوادونه پر دې موافق دي، چې ایران باید اټومي وسلې ترلاسه نه کړي.
بلخوا، د قطر لومړي وزیر او بهرنیو چارو وزیر محمد بن عبدالرحمن آل ثاني د ټرمپ او د امریکا د ولسمشر له مرستیال جي ډي ونس سره د لیدنې په اړه ویلي، چې په سیمه کې د هوکړې او سولې ټینګښت لپاره خبرو اترو ته ارزښت ورکوي.