دفاع وزارت په یوه خبرپاڼه کې ویلي، چې د یاد وزارت اړوند د ځانګړو ځواکونو فرقې ۱۰۰۰ تنه کمانډویان له شپږ میاشتنیو مسلکي، عقیدوي او ځانګړو نظامي زدهکړو وروسته فارغ شول، چې د فراغت په مراسمو کې یې د دفاع او کورنیو چارو وزیرانو ترڅنګ د کابینې یو شمېر غړو او د بهرنیو هېوادونو سفیرانو، نظامي اتشو او ځانګړو استازو ګډون کړی و.
وزارت په وینا د دفاع وزیر مولوي محمد یعقوب مجاهد فارغانو ته په وینا کې ټینګار کړی، چې خپل نظامي خدمتونه دې یوازې د الله تعالی د رضا لپاره ترسره کړي، ترڅو په بدل کې یې په دنیا او اخرت کې اجر ترلاسه کړي.
نوموړي ویلي، افغانستان اوس یو واحد مرکزي نظام لري او د ده په وینا، په هېواد کې داسې کومه ډله نشته چې تخریبي کړنې ترسره کړي او د ناامنۍ د رامنځته کولو اجازه هم هیچا ته نه ورکول کېږي.
د خبرپاڼې د معلومانو له مخې، مجاهد د هېوادوالو ته ډاډ ورکړی، چې ځانګړي ځواکونه به د هغوی د سر، مال او د هېواد له خاورې څخه په مېړانه او تدبیر دفاع کوي. نوموړي بهرنیو هېوادونو ته هم پیغام ورکړی، چې افغانستان اوس امن دی او د ده په خبره، په هېواد کې داسې کوم دښمن شتون نه لري چې له افغانستان څخه نورو هېوادونو ته ګواښ متوجه کړي.
خبرپاڼه زیاتوي، چې د کورنیو چارو وزیر خلیفه سراجالدین حقاني ویلي، چې افغانستان له شاوخوا نیمې پېړۍ وروسته اوس منظم پوځ او امنیتي ځواکونه لري او فارغانو ته یې څرګنده کړه، چې دوی نمایشي اردو نه، بلکې یوه منظمه او خپلواکه اردو ده.
حقاني زیاته کړې، که څه هم افغانستان له مادي پلوه له کمزوریو سره مخ دی، خو په معنوي لحاظ پیاوړی دی. نوموړي له امنیتي ځواکونو غوښتي، چې لوړې حوصلې ولري، په نظامي چارو کې له احساساتي چلند ډډه وکړي او د اړتیا پر مهال د دښمن پر وړاندې په مناسب وخت کې اقدام وکړي.
هغه ټینګار کړی، چې افغانستان د هېڅ هېواد لپاره ګواښ نه دی، بلکې امنیتي او دفاعي ځواکونه یې د خپلې خاورې مدافعین دي.
خبرپاڼه کې راغلي، چې د مراسمو په وروستۍ برخه کې فارغانو د هوايي ځواک په ملتیا ځانګړي نظامي تمرینونه او عملي نمایشاتو ترڅنګ، د بېلابېلو ډولونو پوځي ډرون الوتکو په وسیله مانورونه هم نندارې ته وړاندې کړي دي.