له ارګ څخه په خپره شوې خبرپاڼه کې راغلي، چې د افغان حکومت رئیسالوزراء ملا محمد حسن اخند د روسیې فدراسیون د لومړي وزیر له مرستیال الکسي اوورچوک سره په کتنه کې د دواړو هېوادونو ترمنځ د اقتصادي همکاریو او پانګونې پر پراختیا خبرې کړې دي.
خبرپاڼه زیاتوي، چې ملا محمد حسن اخند ویلي، په افغانستان کې رامنځته شوی امنیت او ثبات د پانګونې لپاره مناسبه زمینه برابره کړې او د دواړو هېوادونو ترمنځ یې د همکاریو ښه فرصتونه برابر کړي دي. نوموړي د روسیې له لوري د افغان حکومت په رسمیت پېژندل د افغانستان پر راتلونکي د دغه هېواد د باور څرګندونه بللې او پر نړیوال سټېج یې د روسیې د ملاتړ مننه کړې.
د خبرپاڼې په حواله، د روسیې د لومړي وزیر مرستیال الکسي اوورچوک په افغانستان کې امنیت، ثبات او پرمختګونه ستایلي او په بېلابېلو برخو کې یې د پانګونې لپاره د خپل هېواد لېوالتیا څرګنده کړې ده.
اوورچوک ویلي، په دې سفر کې د خصوصي سکټور شاوخوا ۷۰ استازي هم ورسره مل دي، ترڅو د افغانستان له وزارتونو او اړوندو ادارو سره د پانګونې، سوداګریزو تفاهملیکونو او شته خنډونو د لرې کولو په اړه خبرې وکړي.