له ارګ څخه په خپره شوې خبرپاڼه کې راغلي، چې د روسیې د لومړي وزیر مرستیال الکسي اوورچوک د ریاستالوزراء له اقتصادي مرستیال ملا عبدالغني برادر سره په کتنه کې ویلي، هېواد یې غواړي د افغانستان د اقتصاد په بیا رغونه، د سوداګریزو اړیکو په پراختیا او د افغان محصولاتو د صادراتو په زیاتوالي کې ونډه واخلي.
اوورچوک ویلي، افغانستان د روسیې لپاره مهم هېواد دی او مسکو له دغه هېواد سره د اړیکو جوړولو او پراختیا ته ارزښت ورکوي.
نوموړي زیاته کړې، افغان حکومت پراخې زېربنایي پروژې پلي کوي او هڅه کوي د خپل جغرافیایي موقعیت په کارولو سره افغانستان د یوراسیا د شمال او جنوب ترمنځ پر ټرانسپورټي او لوژستیکي مرکز بدل کړي.
د روسیې د لومړي وزیر مرستیال د افغانستان د اوږدمهاله ثبات لپاره د شرایطو رامنځته کول مهم بللي او ویلي یې دي، چې هېواد یې غواړي د سوداګریزو اړیکو د پراختیا له لارې د افغانستان له اقتصادي بیا رغونې سره مرسته وکړي، کاري فرصتونه رامنځته کړي او د افغان محصولاتو د صادراتو ملاتړ وکړي.
همدارنګه، اوورچوک د افغان حکومت له هڅو د روسیې د ملاتړ ډاډ ورکړی او د افغانستان په اقتصادي پرمختګ کې یې د خپل هېواد د ونډې اخیستو پر ارادې ټینګار کړی دی.