د بلخ ولایت مقام رسنیو دفتر په یوه خبرپاڼه کې ویلي، چې د دغه ولایت والي ملا محمد یوسف وفا بلخ ولسوالۍ ته د سفر پر مهال د ابونصر فارسا تاریخي جومات د بیارغونې او ترمیم، د ولسوالۍ د ښاروالۍ او یو شمېر پراختیایي پروژو له چارو لیدنه کړې ده.
د خبرپاڼې له مخې، والي د علماوو د فقهي مجلس له نوي جوړ شوي ځای او د دارالحفاظ له ودانۍ هم لیدنه کړې، چې د جوړولو چارې یې ۹۰ سلنه بشپړې شوې دي. نوموړي د پاتې چارو د بشپړېدو او د دارالحفاظ د فعالیت د ژر پیلولو لارښوونه کړې ده.
همدارانګه هغه د بلخ ولسوالۍ په چار باغ کې د شنې ساحې، کټارو او تفریحي اوبو پارک د جوړولو له روانو چارو لیدنه کړې او د دغې پروژې د ژر بشپړېدو سپارښتنه یې کړې ده.
د بلخ والي د ولسوالۍ د بیارغونې، پراختیا، سړکونو او کوڅو د اساسي رغونې له یو شمېر پروژو هم لیدنه کړې او مسوولینو ته یې د چارو د چټکتیا او بشپړېدو سپارښتنه کړې ده.