د عامې روغتیا وزارت په یوه خبرپاڼه کې ویلي، چې د یاد وزارت د خوړو او درملو مرستیال، مولوي حمدالله زاهد د ازبکستان د روغتیا وزارت د درمل جوړونې صنعت د پراختیا ادارې له مرستیال رئیس، ظفربېک قاسموف او مل پلاوي سره لیدلي او د روغتیا او درمل جوړونې په برخو کې یې د ګډو همکاریو پر پراختیا خبرې کړې دي.
د وزارت په وینا د درملو د سوداګرۍ د کچې لوړولو، د دواړو هېوادونو ترمنځ د شویو ژمنو عملي کولو او د همکاریو د پراخولو پر لارو چارو بحث شوی، چې ازبکستاني پلاوي په دې برخو کې د همکاریو پراختیا ته لېوالتیا څرګنده کړې ده.
مولوي حمدالله زاهد د ازبکستاني پلاوي د هرکلي ترڅنګ د دواړو هېوادونو ترمنځ د ښو اړیکو پر اهمیت ټینګار کړی او ویلي یې دي، چې د درملو او طبي توکو په برابرولو کې باید شخصي ګټې نه، بلکې د خلکو روغتیا او د محصولاتو کیفیت لومړیتوب ولري.