د عامې روغتیا وزارت ویلي، چې د یاد وزارت وزیر، مولوي نور جلال جلالي د یوه پلاوي په مشرۍ د تخار ولایت د فرخار او ورسج ولسوالیو له یو شمېر روغتیايي مرکزونو لیدنه کړې او د روغتیايي خدمتونو او ودانیزو چارو بهیر یې ارزولی دی.
د وزارت د معلوماتو له مخې، ښاغلي جلالي د فرخار ولسوالۍ د ۵۰ بستریز روغتون د جوړېدو چارې او د ورسج ولسوالۍ په جامع روغتیايي مرکز کې د وړاندې کېدونکو روغتیايي خدمتونو بهیر له نږدې کتلی دی.
نوموړي د روغتیايي خدمتونو د کیفیت لوړولو په موخه اړوندو مسوولینو او روغتیايي کارکوونکو ته سپارښتنه کړې، چې د خدمتونو وړاندې کولو پر مهال طبي اخلاق او مسلکي معیارونه په پام کې ونیسي.